പി.കെക്കെതിരെ കോഴിക്കോട്ട് ഹനുമാൻ സേനയുടെ പ്രതിഷേധം; ഇത്തരം സംഘടനകൾ കലാകാരൻമാർക്ക് ഭീഷണിയെന്ന് കമൽ

കോഴിക്കോട്: ആമീർഖാൻ നായകനായ പികെ പ്രദർശിപ്പിക്കുന്ന തീയേറ്ററിന് മുന്നിൽ ഹനുമാൻ സേനാ പ്രവർത്തകരുടെ പ്രതിഷേധം. കോഴിക്കോട് ക്രൗൺ തീയറ്ററിന് മുന്നിലായിരുന്നു പ്രതിഷേധം. പ്രദർശനം നിർത്തിവയ്ക്കണം എന്നാവശ്യപ്പെട്ടാണ് പ്രവർത്തകർ പ്രതിഷേധം നടത്തിയത്. തീയേറ്ററിന് പുറത്ത് മാർച്ച് പോലീസ് തടഞ്ഞു. പുരോഗമന ചിന്താഗതിയുള്ള കേരളീയർക്കിടയിലാണ് ഇതു പോലെയുള്ള വിഷവിത്തുകൾ വീണു കൊണ്ടിരിക്കുന്നതെന്നും ഇതിൽ കലാകാരൻമാർക്ക് ഭയമുണ്ടെന്നും സംവിധായകൻ കമൽ പ്രതികരിച്ചു. സംഘപരിവാറിന്റെ പരിപാടികളിൽ പങ്കെടുത്ത മേജർ രവിക്കും പ്രിയദർശനും അതിലെ അപകട സൂചന തിരിച്ചറിഞ്ഞെന്നും അദ്ദേഹം പറഞ്ഞു [gallery ids="3659"]

rametan5

നെല്‍കര്‍ഷകര്‍ സര്‍ക്കാരിന് എതിരെ സമരത്തിലേക്ക്

ആലപ്പുഴ: സംസ്ഥാനത്തെ നെല്‍കര്‍ഷകര്‍ സര്‍ക്കാരിന് എതിരെ സമരത്തിലേക്ക്. നാല് മാസം മുന്‍പ് സംഭരിച്ച നെല്ലിന്റെ പണം നല്‍കാത്തതിനാലാണ് കര്‍ഷകര്‍ സമരത്തിനിറങ്ങുന്നത്. നെല്ല് സംഭരിച്ച ഇനത്തില്‍ മുപ്പത്തിയാറ് കോടിയോളം രൂപയാണ് സംസ്ഥാനത്ത് ഓട്ടാകെ സപ്ലൈകോ നല്‍കാനുള്ളത്.

നെല്ല് സംഭരിച്ച ഇനത്തില്‍ ആലപ്പുഴ ജില്ലയില്‍ മാത്രം 22 കോടിയിലധികം രൂപയാണ് സപ്ലൈകോ കര്‍ഷകര്‍ക്ക് നല്‍കാനുള്ളത്. കോട്ടയത് 13 കോടിയും പാലക്കാട് നാല് കോടിയോളം രൂപയും നല്‍കാനുണ്ട്. സെപ്റ്റംബര്‍ ആദ്യ ആഴ്ച്ച മുതല്‍ സംഭരിച്ച നെല്ലിന്റെ തുകയാണ് ഇതുവരെ നല്‍കാത്തത്. നെല്ലിനുള്ള വില ഒരാഴ്ച്ചയ്ക്കകം ബാങ്ക് വഴി വിതരണം ചെയ്യണമെന്നാണ് വ്യവസ്ഥയെങ്കിലും നാല് മാസം പിന്നീട്ടിട്ടും ഒരു രൂപ പോലും ലഭിക്കാത്തത് കര്‍ഷകരെ പ്രതിസന്ധിയിലാക്കുന്നു.

ആലപ്പുഴ, കോട്ടയം, തൃശ്ശൂര്‍, പാലക്കാട് വയനാട് എന്നീ ജില്ലകളില്‍ നിന്നുള്ള നെല്ല് കര്‍ഷകര്‍ നാളെ സെക്രട്ടേറിയേറ്റ് പടിക്കല്‍ നടക്കുന്ന സമരത്തില്‍ പങ്കെടുക്കുമെന്ന് സംഘാടകര്‍ അറിയിച്ചു. സംസ്ഥാനത്ത് കാര്‍ഷിക ബോര്‍ഡ് ആരംഭിക്കണമെന്നും സമരക്കാര്‍ ആവശ്യപ്പെടുന്നു.

download (1)

ശിവഗിരി മഠത്തിലെ സന്യാസിമാര്‍ക്കെതിരേ വെള്ളാപ്പള്ളി

ശിവഗിരി മഠത്തിലെ സന്യാസിമാര്‍ക്കെതിരേ രൂക്ഷ വിമര്‍ശനവുമായി എസ്‌.എന്‍.ഡി.പി. യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. സന്യാസിമാര്‍ ത്യാഗികളാകണമെന്നും അധികാരത്തിനുവേണ്ടി വടംവലിക്കാന്‍ പാടില്ലെന്നും കോട്ടയത്ത്‌ നാഗമ്പടം ക്ഷേത്രാങ്കണത്തില്‍ ശിവഗിരി തീര്‍ഥാടന പതാക ഘോഷയാത്ര ഉദ്‌ഘാടനം ചെയ്‌ത്‌ അദ്ദേഹം പറഞ്ഞു. സ്വാമിമാര്‍ക്കിടയില്‍ നൂറു ഗ്രൂപ്പാണെന്നും അധികാരത്തിനുവേണ്ടി അവര്‍ കോടതികള്‍ കയറിയിറങ്ങുകയാണെന്നും വെള്ളാപ്പള്ളി പറഞ്ഞു.

സന്യാസിമാരെ കാണാനായല്ല തീര്‍ഥാടകര്‍ ശിവഗിരിയിലെത്തുന്നത്‌. സമാധിമണ്ഡപം കണ്ടു പ്രാര്‍ഥിക്കാനായാണ്‌. തീര്‍ഥാടകര്‍ക്ക്‌ ആത്മീയ അടിത്തറയൊരുക്കുന്ന സഥലമാണു ശിവഗിരി. തീര്‍ഥാടകര്‍ക്കു യോഗം സൗകര്യങ്ങള്‍ ഒരുക്കും. അതു യോഗത്തിന്റെ ബാധ്യതയാണ്‌. തീര്‍ഥാടകര്‍ക്കു കഞ്ഞി കൊടുക്കാന്‍ സ്‌ഥലം ചോദിച്ചിട്ടു പോലും നല്‍കിയില്ല, വാടക നല്‍കാമെന്നു പറഞ്ഞിട്ടും സ്‌ഥലം നല്‍കാന്‍ കൂട്ടാക്കിയില്ലെന്നും വെള്ളാപ്പള്ളി വിമര്‍ശിച്ചു.

ശിവഗിരിയില്‍ എന്തോ തെറ്റിദ്ധാരണയുണ്ട്‌. മദ്യനിരോധനമെന്ന നിലപാടാണു മഠത്തിന്റേത്‌. മദ്യ നിരോധനമല്ല, മദ്യവര്‍ജനമാണു വേണ്ടത്‌. ശിവഗിരിയില്‍നിന്നു പറയുന്നതിന്‌ ആരെങ്കിലും വില കല്‍പ്പിക്കുന്നുണ്ടോ? മദ്യനിരോധനം എന്ന ആവശ്യം ഉന്നയിച്ചിരുന്ന ബിഷപ്പുമാരെ വരെ ഉമ്മന്‍ചാണ്ടി കൈയിലാക്കി. എന്നിട്ടും ശിവഗിരിമഠം എന്തിനാണ്‌ ഇക്കാര്യത്തില്‍ വാശി പിടിക്കുന്നതെന്നു മനസിലാകുന്നില്ല.

കള്ളുകച്ചവടക്കാരുടെ പണം വേെണ്ടന്നു ശ്രീനാരായണ ഗുരു പറഞ്ഞിട്ടില്ല. അദ്ദേഹം കള്ളുകച്ചവടക്കാരുടെ വീട്ടില്‍ താമസിക്കുകയും അവരുടെ സമ്പത്ത്‌ വാങ്ങുകയും ചെയ്‌തിട്ടുണ്ട്‌. പ്രായോഗിക തീരുമാനങ്ങളാണു വേണ്ടത്‌. ജാതിവ്യവസ്‌ഥയില്‍നിന്നു മാറി ജനാധിപത്യം വന്നിട്ടും ഈഴവരെപ്പോലുള്ളവര്‍ക്കു നീതി ലഭിക്കുന്നില്ലെന്നും വോട്ടു ബാങ്ക്‌ മാത്രം ലക്ഷ്യമിട്ടുള്ള ഭരണ പരിഷ്‌കാരമാണു ഭരണനേതൃത്വം നടത്തുന്നതെന്നും വെള്ളാപ്പള്ളി പറഞ്ഞു.

ചാതുര്‍വര്‍ണ്യത്തിന്റെ പേരിലാണ്‌ പണ്ട്‌ നീതി നിഷേധിച്ചിരുന്നത്‌, ഇപ്പോള്‍ നിയമങ്ങളും ചട്ടങ്ങളും പറഞ്ഞാണു നീതി നിഷേധിക്കുന്നത്‌. യോഗവും ശിവഗിരി മഠവും തമ്മില്‍ ഭിന്നതയില്ലെന്നും ഇതില്‍ വെള്ളം ചേര്‍ക്കാന്‍ ഏതു സ്വാമി വിചാരിച്ചാലും നടക്കില്ലെന്നും സമ്മേളനത്തിനുമുമ്പ്‌ വെള്ളാപ്പള്ളി മാധ്യമപ്രവര്‍ത്തകരോടു പറഞ്ഞു. ബാര്‍ വിഷയത്തില്‍ സുധീരന്‍ വെള്ളത്തിലായെന്നും സര്‍ക്കാരിന്റെ നയങ്ങളില്‍ പലതും ന്യുനപക്ഷ പ്രീണനത്തിന്റെ ഭാഗമായുള്ളതാണെന്നും അദ്ദേഹം പറഞ്ഞു.

സമ്മേളനത്തില്‍ എസ്‌.എന്‍.ഡി.പി. കോട്ടയം യൂണിയന്‍ പ്രസിഡന്റ്‌ എ.ജി. തങ്കപ്പന്‍ അധ്യക്ഷത വഹിച്ചു. സെക്രട്ടറി ആര്‍. രാജീവ്‌, കൗണ്‍സിലര്‍ എം. മധു, കെ.വി. ശശികുമാര്‍, എം.ആര്‍. പ്രദീപ്‌ കുമാര്‍, പി. അനില്‍കുമാര്‍, റിജേഷ്‌ സി. ബ്രീസ്‌വില്ല, വി.എം. ശശി, ഗിരീഷ്‌ കോനാട്ട്‌ എന്നിവര്‍ പ്രസംഗിച്ചു.

10525620_1757149637842806_3444084573531445096_n copy

ക്ഷേത്രവളപ്പില്‍ ആര്‍.എസ്.എസ്​ ആയുധപരിശീലനത്തിനെതിരെ ഓബുഡ്‍‍സ്‍മാന്​ പരാതി നല്‍കിയ ഡി.വൈ.എഫ്.ഐ പ്രവര്‍ത്തകനെ ആര്‍.എസ്.എസുകാര്‍ വെട്ടി പരിക്കേല്‍പ്പിച്ചു.

കൊല്ലം തൃക്കടവൂര്‍ ക്ഷേത്രവളപ്പില്‍ ആര്‍.എസ്.എസ്​ ആയുധപരിശീലനത്തിനെതിരെ ഓബുഡ്‍‍സ്‍മാന്​ പരാതി നല്‍കിയ ഡി.വൈ.എഫ്.ഐ പ്രവര്‍ത്തകനെ ആര്‍.എസ്.എസുകാര്‍ വെട്ടി പരിക്കേല്‍പ്പിച്ചു. ഡി.വൈ.എഫ്.ഐ അഞ്ചാലുമൂട്​ ഏരിയ കമ്മറ്റി അംഗം കൃഷ്‍ണകുമാറിനെയാണ്​ ഇന്നലെ രാത്രി ആര്‍.എസ്.എസ്​ സംഘം മാരകായുധങ്ങളാല്‍ വെട്ടിപ്പരിക്കേല്‍പ്പിച്ചത്​. കൃഷ്‍ണകുമാറിന്റെ പരാതിയെതുടര്‍ന്ന്​ നടത്തിയ അന്വേഷണത്തില്‍ ദേവസ്വം ഓംബുഡ്സ്‍മാന്‍ റിപ്പോര്‍ട്ടിലും ദേവസ്വം തെക്കന്‍മേഖല വിജിലന്‍സ്​ അന്വേഷണത്തിലും ആയുധപരിശീലനം ശരിവെച്ചിരുന്നു. സംഭവത്തെക്കുറിച്ച്​ മാധ്യമങ്ങളില്‍ വാര്‍ത്തവന്നശേഷം കൃഷ്‍ണകുമാറിനെ വധിക്കുമെന്ന്​ ആര്‍.എസ്.എസുകാര്‍ ഭീക്ഷണി മു‍ഴക്കിയിരുന്നു. കൈക്കും ശരീരത്തിനും വെട്ടേറ്റ കൃഷ്‍ണകുമാര്‍ അഞ്ചാലുമൂട്​ ആശുപത്രിയില്‍ ചികി‍ത്സയിലാണ്​.  

header2
123_jpg_214964f
കാസര്‍കോട് ചെര്‍ക്കളയില്‍ ഗ്യാസ് ടാങ്കര്‍ മറിഞ്ഞു: ഡീസല്‍ ടാങ്ക് പൊട്ടി

കാസര്‍കോട്: കാസര്‍കോട് ചെര്‍ക്കളയില്‍ ഗ്യാസ് ടാങ്കര്‍ മറിഞ്ഞു. ടാങ്കറിന്റെ ഇന്ധന ടാങ്ക് പൊട്ടി ഡീസല്‍ റോഡിലേക്ക് പരന്നൊഴുകി. വാതക ചോര്‍ച്ച ഉള്ളതായി വിവരം ലഭിച്ചിട്ടില്ല. കാസര്‍കോട് നിന്നും അഗ്നിശമന സേനയുടെ രണ്ട് യൂണിറ്റുകള്‍ സ്ഥലത്തെത്തിയിട്ടുണ്ട്. മംഗലാപുരത്ത് നിന്നും കണ്ണൂരിലേക്ക് പോവുകയായിരുന്ന ഗ്യാസ് ടാങ്കറാണ് രാത്രി 8.20 ഓടെ മറിഞ്ഞത്. കാസര്‍കോട് ഡി.വൈ.എസ്.പി. ടി.പി. രഞ്ജിത്ത്, വിദ്യാനഗര്‍ എസ്.ഐ. എം. ലക്ഷ്മണന്‍ എന്നിവരുടെ നേതൃത്വത്തില്‍ സുരക്ഷാ നടപടികള്‍ ആരംഭിച്ചിട്ടുണ്ട്. പരിസരത്ത് നിന്നും ആളുകളെ മാറ്റി. സംഭവസ്ഥലത്തേക്ക് ആരേയും പൊലിസ് കടത്തിവിടുന്നില്ല.

vm-sudheeran.jpg.image.576.432
എല്ലാം സ്വന്തം കൈയിലാണെന്ന് ആരും തെറ്റിദ്ധരിക്കരുത്: വി. എം. സുധീരന്‍

എല്ലാം സ്വന്തം കൈയിലാണെന്ന് ആരും തെറ്റിദ്ധരിക്കരുതെന്ന് കെപിസിസി പ്രസിഡന്റ് വി. എം. സുധീരന്‍. അധികാരം നഷ്ടപ്പെട്ടാല്‍ ഇപ്പോഴുള്ളവര്‍ കൂടെയുണ്ടാവണമെന്നില്ല. കെ. കരുണാകരന്‍റെ അനുഭവം അതാണ് പഠിപ്പിക്കുന്നതെന്നും സുധീരന്‍ പറഞ്ഞു. ചില വിഷയങ്ങളില്‍ തുടക്കത്തില്‍ ഒറ്റയ്ക്കായിരുന്നു. പിന്നീടാണ് പാര്‍ട്ടി അതേറ്റെടുത്തത്. മുരളീധരനെ പാര്‍ട്ടിയില്‍ തിരി‍ച്ചെടുക്കുന്നതിനെ പി.സി. ചാക്കോയും. കെ.കെ. രാമചന്ദ്രനും താനും മാത്രമാണ് അനുകൂലിച്ചത്. മുരളീധരന്‍ അക്കാര്യം മറന്നുപോയേക്കാമെന്നും വി. എം. സുധീരന്‍ പറഞ്ഞു.

bfe86e93b1bf7927f75aa7cf7560e024
ഇറച്ചി കോഴി വില നൂറ് കടന്നു

ക്രിസ്മസ് ആഘോഷത്തിനുള്ള ഒരുക്കങ്ങള്‍ക്കിടെ ഇറച്ചിക്കോഴിവില നൂറ് കടന്നു. പക്ഷിപ്പനിബാധയെ തുടര്‍ന്ന് കര്‍ഷകര്‍ ഉല്‍പാദനം കുറച്ചതും ആവശ്യക്കാരേറിയതുമാണ് വിലവര്‍ധനക്കിടയാക്കിയത്. പത്ത് ദിവസം മുന്‍പ് ഇറച്ചിക്കോഴി വില നാല്‍പ്പത്തി നാലായിരുന്നുവെങ്കില്‍ രണ്ടാഴ്ച പിന്നിട്ടപ്പോള്‍ നൂറ് കടന്നു. പക്ഷിപ്പനിബാധയെത്തുടര്‍ന്ന് തദ്ദേശീയരായ കോഴിക്കര്‍ഷകര്‍ ഉല്‍പാദനത്തില്‍ കുറവ് വരുത്തിയിരുന്നു. തമിഴ്നാട്ടില്‍ നിന്നുള്ള കോഴിവരവിന് നിയന്ത്രണവുമുണ്ടായിരുന്നു. ഇത് പിന്‍വലിച്ചെങ്കിലും ആവശ്യക്കാര്‍ വര്‍ധിച്ചതാണ് വില വര്‍ധനയുടെ കാരണമായിപ്പറയുന്നത്. വരും ദിവസങ്ങളില്‍ വിലയില്‍ ഇനിയും വര്‍ധനയുണ്ടായേക്കാം. പക്ഷിപ്പനിബാധ താറാവിറച്ചിയുടെ ആവശ്യം കുറച്ചതിനൊപ്പം വ്യാപാരികളും താറാവ് വില്‍പന ഉപേക്ഷിച്ച മട്ടാണ്.താറാവിറച്ചിക്ക് വില കുറഞ്ഞപ്പോള്‍ ഗ്രാഫുയര്‍ന്നത് ആട്, പശു, പോത്ത് എന്നിവയുടെ ഇറച്ചിവിലയാണ്. 500 നും 250 നുമിടയാണ് ഇവയുടെ വില. കോഴിവിലത്തകര്‍ച്ചയെത്തുടര്‍ന്ന് നേട്ടമുണ്ടാക്കിയ മല്‍സ്യവിലയും ഉയര്‍ന്നുതന്നെയാണ്.പക്ഷിപ്പനിബാധയ്ക്കു ശേഷൡ കച്ചവടം കൂടിയെങ്കിലും ഇറച്ചിയുടെ ഗുണനിലവാരം പരിശോധിക്കുന്നതിനുള്ള സംവിധാനങ്ങള്‍ പലയിടത്തും കാര്യക്ഷമമല്ലെന്നും പരാതിയുണ്ട്.

shock-current
സബ്‌സിഡി പിൻവലിച്ചു; വൈദ്യുതി നിരക്ക് കുത്തനേ കൂടി

 ബില്ലുകളിൽ 200- 1000 രൂപയുടെ വർദ്ധന തിരുവനന്തപുരം: സബ്‌സിഡി പിൻവലിച്ചതോടെ വൈദ്യുതി നിരക്ക് കുത്തനേ കൂടിയത് ഉപഭോക്താക്കൾക്ക് ഇരുട്ടടിയായി. വൈദ്യുതി ബില്ലിലുണ്ടായ വർദ്ധന കണ്ട് പലരും അന്തംവിടുകയാണ്. മീറ്റർ തകരാറാണെന്ന് ധരിച്ച് പലരും പരാതിയുമായി ചെന്നപ്പോഴാണ് അതല്ല, സർക്കാർ സബ്‌സിഡി പിൻവലിച്ചതാണ് വില്ലനായതെന്ന് തിരിച്ചറിഞ്ഞത്!

കഴിഞ്ഞ ആഗസ്റ്റ് വരെയാണ് സർക്കാർ പിൻബലത്തിൽ കെ.എസ്.ഇ.ബി സബ്സിഡി നൽകിവന്നത്. 125 യൂണിറ്റുവരെ ഉപയോഗിക്കുന്നവർക്ക് യൂണിറ്റിന് 25 പൈസയായിരുന്നു സബ്‌സിഡി. എന്നാൽ അതിന് ശേഷം സബ്‌സിഡി നൽകാനാവില്ലെന്ന് സർക്കാർ വ്യക്തമാക്കി. സബ്‌സിഡി തുടരാൻ സർക്കാർ തീരുമാനമെടുക്കുമെന്ന പ്രതീക്ഷയിൽ കെ.എസ്.ഇ.ബി ഒരുതവണ കൂടി ആനുകൂല്യം തുടർന്നു. സബ്‌സിഡി നൽകില്ലെന്ന് സർക്കാർ തീർത്തു പറഞ്ഞതോടെ കെ.എസ്.ഇ.ബിയും പിൻവാങ്ങി. ഇതോടെ വിവിധ സ്ലാബുകളിലെ ബില്ലുകളിൽ 200 മുതൽ 1000 രൂപയുടെ വരെ വർദ്ധന ഉണ്ടായി.

മുൻ റീഡിംഗിൽ നിന്ന് ഇപ്പോഴത്തെ റീഡിംഗ് കുറയ്ക്കുമ്പോൾ കിട്ടുന്നതാണ് വൈദ്യുതി ഉപഭോഗം. മുൻ ഉപഭോഗവും ഇപ്പോഴത്തെ ഉപഭോഗവും ബില്ലിൽ രേഖപ്പെടുത്തും. വൈദ്യുതി ബില്ലിനു നാലു ഭാഗങ്ങളാണുള്ളത്. ഇതിൽ ഫിക്‌സഡ് ചാർജ് (സിംഗിൾ ഫെയ്‌സ് 40 രൂപ, ത്രീ ഫെയ്‌സ് 120 രൂപ), മീറ്റർ വാടക (സിംഗിൾ ഫെയ്‌സ് 12 രൂപ, ത്രീ ഫെയ്‌സ് 30രൂപ) എന്നിവയ്ക്കു മാറ്റമില്ല. എന്നാൽ ഉപഭോഗത്തിനനുസരിച്ച് വൈദ്യുതി നിരക്കും ഡ്യൂട്ടിയും (എനർജി ചാർജിന്റെ പത്തു ശതമാനം) മാറും.