കേരളത്തിന് പ്രശംസ,അഞ്ചാം വര്‍ഷക്കാര്‍ക്ക് ഹജ്ജിന് നേരിട്ട് അവസരം

Story Dated :December 7, 2014

aasere

കൊണ്ടോട്ടി: സംസ്ഥാന ഹജ്ജ് കമ്മിറ്റി മുഖേന തുടര്‍ച്ചയായി നാലു തവണ അപേക്ഷിച്ചിട്ടും ഹജ്ജിന് അവസരം ലഭിക്കാത്തവര്‍ക്ക് അടുത്ത വര്‍ഷം നേരിട്ട് അവസരം നല്‍കാന്‍ കേന്ദ്ര ഹജ്ജ് കമ്മിറ്റി തീരുമാനിച്ചു. ഇന്നലെ മുംബൈയില്‍ കേന്ദ്ര ഹജ്ജ് കമ്മിറ്റി വിളിച്ചുചേര്‍ത്ത സംസ്ഥാന ഹജ്ജ് കമ്മിറ്റി പ്രതിനിധികളുടെ യോഗത്തിലാണു തീരുമാനം .സംസ്ഥാന ഹജ്ജ് കമ്മിറ്റി ചെയര്‍മാന്‍ കോട്ടുമല ടി.എം.ബാപ്പുമുസ്ല്യാരാണ് കേരളത്തിന്റെ വിഷയം യോഗത്തില്‍ അവതരിപ്പിച്ചത്. തുടര്‍ന്നാണ് ഇവര്‍ക്ക് നേരിട്ട് അനുമതി നല്‍കാന്‍ കേന്ദ്രം തിരുമാനിച്ചത്. ഇതോടെ അഞ്ചാം വര്‍ഷക്കാരായ അപേക്ഷകര്‍ക്കു നറുക്കെടുപ്പില്ലാതെ നേരിട്ട് അവസരം ലഭിക്കുമെന്ന് ഉറപ്പായി. കേരളത്തില്‍ നിന്നു നാലാം വര്‍ഷക്കാരായ 3352 പേര്‍ക്കാണ് കഴിഞ്ഞവര്‍ഷം അവസരം നഷ്ടമായത്. ഇവര്‍ക്ക് പ്രത്യേക ഹജ്ജ് ക്വോട്ട അനുവദിക്കണമെന്നു കേരളം ആവശ്യപ്പെട്ടിട്ടുണ്ട്. ഇക്കാര്യം പരിഗണിക്കാമെന്നാണു മറുപടി ലഭിച്ചത്. അടുത്ത ഹജ്ജ് അപേക്ഷാ ഫോം വിതരണവും സ്വീകരണവും ജനുവരി രണ്ടാംവാരം ആരംഭിക്കും. മികച്ച രീതിയില്‍ ഹജ്ജ് സര്‍വീസ് നിര്‍വഹിച്ച കേരളത്തെ യോഗത്തില്‍ അഭിനന്ദിച്ചു. എന്നാല്‍ കേരളം ഒഴികെയുളള സംസ്ഥാനങ്ങള്‍ക്കെല്ലാം നിരവധി പരാതികളാണ് ഉന്നയിക്കാനുണ്ടായിരുന്നത്. എയര്‍ ഇന്ത്യയുടെ ഹജ്ജ് സര്‍വീസിനെക്കുറിച്ചായിരുന്നു ഏറെ ആക്ഷേപം. ഇന്ത്യയില്‍ നിന്ന് 14 ഹജ്ജ് എമ്പാര്‍ക്കേഷന്‍ പോയിന്റുകളില്‍ നിന്നാണ് എയര്‍ഇന്ത്യ ഈ വര്‍ഷം ഹജ്ജ് സര്‍വീസ് നടത്തിയത്. മറ്റുളള ഏഴ് സ്ഥലങ്ങളില്‍ നിന്ന് സൗദി എയര്‍ലൈന്‍സും സര്‍വീസ് നടത്തി. കേരളത്തില്‍ നിന്ന് സൗദി എയര്‍ലൈന്‍സാണ് ഹജ്ജ് സര്‍വീസ് നടത്തിയത്. സംസ്ഥാന ഹജ്ജ് കമ്മിറ്റി ചെയര്‍മാന്‍ കോട്ടുമല ടി.എം.ബാപ്പുമുസ്ല്യാര്‍, കേന്ദ്ര ഹജ്ജ് കമ്മിറ്റിയംഗം അബ്ദുസമ്മദ് പൂക്കോട്ടൂര്‍, ഹജ്ജ് അസി. സെക്രട്ടറി ഇ.സി.മുഹമ്മദ് എന്നിവര്‍ സംബന്ധിച്ചു.

Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

belowhead